د افغانستان اسلامي امارت زعیم شیخ هبة‌الله اخندزاده حفظه الله د نېکمرغه کوچني اختر په مناسبت افغان ولس او ټولو مسلمانانو ته د مبارکۍ پیغام ورکړی دی.

نوموړي د اختر د لمانځلو ترڅنګ، پر تقوا، د الله تعالی د شریعت پر پیروي، د یووالي پر ساتلو، د امنیت پر قدر کولو او د اسلامي نظام پر ملاتړ ټینګار کړی دی.

هغه ویلي، اختر د خوشحالۍ، یووالي او د الله تعالی د شکر ادا کولو ورځ ده او باید د اسلامي ارزښتونو سره ونمانځل شي.

په پیغام کې د روژې د برکتونو یادونه شوې او ویل شوي چې دا میاشت د ګناهونو د بښنې، د نفس تزکیې او د نیکو عملونو د زیاتوالي میاشت ده.

همدارنګه عالیقدر امیرالمؤمنین  د افغانستان د امن د دوام لپاره دعا کړې او ټینګار یې کړی، چې افغانان باید خپل ملي یووالی وساتي او د خپل اسلامي نظام ملاتړ ته دوام ورکړي.