د خوست ولایت مطبوعاتي دفتر په یوه خبر کې وايي چې دې ولایت ته راتلونکي ١٠٨ ټنه خوسا او بېکیفیته کچالو بیرته پاکستان ته ور وګرځول شول.
په خبر کې د خوست ولایت مقام په حواله راځي چې د دې ولایت د کرنې، اوبو لګولو او مالدارۍ رياست اړوند د نباتي قرنطين کارکوونکو له لوري، د دغه ولايت په غلام خان بندر کې له پاکستانه د ١٠٨ مټريک ټنه خوسا شويو او بې کیفیته کچالو د ورادولو مخه ونيول شوه. ياد کچالو له چيک او تشخيص وروسته بېرته پاکستان ته ور وګرځول شول.
د یادونې وړ ده، چې تیره ورځ هم د ياد رياست د نباتي قرنطین ټیمونو لهخوا ٣٦ ټنه خوسا او بېکیفیته کچالو بېرته پاکستان ته ور ګرځول شوي وو.
