د غزني په روضې کوتل کې د دوو موټرو د ټکر له امله شپږ تنه مړه او یو ټپي شوی
د غزني ولایت په روضې کوتل سیمه کې د کابل – کندهار پر لویه لاره د ۵۸۰ او پاسو موټرو د ټکر په پایله کې شپږ کسان مړه او یو تن نور ټپي شوی دی.
د غزني د والي ویاند عزتالله سعیدي وایي چې پېښه هغه مهال رامنځته شوه کله چې له کندهار څخه کابل ته روان ۵۸۰ موټر له یو پاسو موټر سره وجنګېد. د نوموړي په وینا، په قربانیانو کې ښځې او ماشومان هم شامل دي.
سیمهییزې سرچینې وایي چې د ټکر له امله پاسو موټر په بشپړه توګه له منځه تللی دی.
یاده دې وي چې پرون هم د غزني په واغظ او آب بند ولسوالیو کې د ترافیکي پېښو له امله یو تن مړ او څلور تنه نور ټپیان شوي وو. څو ورځې وړاندې بیا د همدې لویې لارې پر سر په دوو جلا پېښو کې ګڼو هېوادوالو خپل ژوند له لاسه ورکړی و.
د ترافیکي پېښو د زیاتوالي په تړاو مسوولین وایي چې د دې پېښو عمده لاملونه د موټرچلوونکو بېاحتیاطي، د خرابو سړکونو شتون، چټک تګ او د ترافیکي اصولو نه مراعاتول دي.
