ماليې وزارت؛ تېرو درېیو میاشتو کې ۳۲۴ ټانکره بېکیفیته نفتی مواد بېرته ګرځول شوي
د مالیې وزارت د نفتي موادو د کیفیت څارنې ریاست وايي، په تېرو درېیو میاشتو کې د هېواد له بېلابېلو ګمرکونو ۳۲۴ ټانکره بېکیفیته نفتی مواد مسترد شوي دي.
د یاد ریاست د معلوماتو له مخې، د ملي معیارونو ادارې په همغږۍ سره دا اقدام د واردېدونکو موادو د کیفیت د ارزونې او د ټیټې کچې نفتو د مخنیوي په موخه ترسره شوی دی.
د مسترد شوو موادو له ډلې ۲۹۷ ټانکره ډیزل او ۲۳ ټانکره پېټرول د نیمروز له بندر، او ۴ ټانکره پټرول د حیرتان او شیرخان بندرونو له لارې بېرته ستانه شوي دي.
د مالیې وزارت ټینګار کوي، چې د هېواد ملي اقتصاد او خلکو د خوندیتوب په موخه به د نفتو او نورو وارداتي موادو د کیفیت څارنه لا نوره هم پیاوړې کړي.
