له خوسته سرچینې وایي چې په دې ولایت کې د يو اته کلن بې ګناه ماشوم تورن قاتل د دې ولایت د امنیتي ځواکونو له لورې ونيول شو.
د خوست امنيه قومندانۍ اړوند د تڼيو ولسوالۍ د جنايي جرمونو سره د مبارزې بيدارو ځواکونو هغه تورن قاتل نيولى، چې اووه میاشتې مخکې يې د تڼيو ولسوالۍ اطمان کلي کې د مدرسې اته کلن زدهکونکی په تيږو او ډبرو په ظالمانه او مرموز ډول وژلى و.
نيول شوى تورن قاتل د تڼيو ولسوالۍ د اطمان کلي اوسيدونکى دی، چې دوسیه به یې د وروستیو څېړنې په موخه عدلي او قضايي ارګانونو ته وسپارل شي، ترڅو له خپل ترسره کړي او نه بښونکي جنایت سره سمه سنګینه سزا وویني.
د يادونې وړ ده، چې له نن شاوخوا اوه مياشتې مخکې نيول شوي تورن قاتل د تڼيو ولسوالۍ اطمان کلي کې د فتح الله په نوم اته کلن طالب العلم په ډېر وحشيانه ډول په شهادت رسولی و، چې بالاخره له جدي څار او دقيقو پلټنو وروسته کشف او د یو لړ بریالیو عملیاتو په پایله کې ونيول شو.
