چارواکي؛ په پکتیا او خوست ولایتونو کې د دوو بېلابېلو اورلګېدنو مخه پر وخت ونیول شوه.
د پکتیا ولایت په څمکنیو ولسوالۍ سرنګوړ کلي کې د کور دننه اور لګېدنه رامنځته شوه، چې د اطفایې مدیریت اړوند د ډنډ پټان د اطفایې امریت منسوبینو او د څمکنیو امنیتي ځواکونو پر خپل وخت اور مهار کړ. د چارواکو په وینا، دا اور د کور غړو د بېاحتیاطۍ له امله رامنځته شوی و چې شاوخوا پنځه لکه افغانۍ مالي زیان یې اړولی، خو د اطفایې پرسونل پر وخت اقدام د کور د نورو وسایلو له سوځېدو مخه ونیوله.
ورته مهال، د خوست ښار د دویمې امنیتي حوزې اړوند د عسکري کلب په سیمه کې یو کرولا موټر د برېښنايي وایرینګ ستونزې له امله اور واخیست. د خوست امنیه قومندانۍ د اطفایې منسوبینو په چټک غبرګون د اور خپرېدو او د موټر بشپړ سوځېدو مخه ونیوله.
د دواړو پېښو په پایله کې شاوخوا ۲۰ زره افغانۍ مالي زیان رامنځته شوی او د نږدې ۱۲۰ زره افغانیو د زیان مخه نیول شوې ده. د چارواکو په وینا، په یادو اورلګېدنو کې ځاني تلفات نه دي رامنځته شوي.
