رویټرز خبري اژانس راپور ورکړی، چې په قطر کې د اوربند په اړه د حماس او اسرايیل ترمنځ نامستقیمې خبرې بې پایلې پای ته ورسېدې. دوو فلسطیني سرچینو د دوشنبې په سهار وویل، چې د اسرايیل پلاوی له حماس سره د هوکړې له پاره کافي صلاحیت نه لري.

مخکې تر دې چې د اسراييل لومړی وزیر بنیامین نتنیاهو واشنګټن ته لاړ شي؛ دغه خبرې د یکشنبې په ورځ له سره پیل شوې.

فلسطيني سرچینو ویلي، چې اسراييلي پلاوی د هوکړي له پاره کافي صلاحیت نه لري.

نتنیاهو واشنګټن ته له تګ وړاندې ویلي و، چې د اسرايیل پلاوي ته د اوربند او خبرو له پاره روښانه لارښوونه شوې ده.

د شنبې په ماښام، سلګونه اسراييليان د تل ابیب په یوه چوک کې د دفاع وزارت مرکزي دفتر ته راټول شوي وو؛ دوی د اوربند او غزه کې د پاتې شاوخوا ۵۰ یرغمل شویو اسراييلیانو د خوشي کېدو غوښتنه کوله.