خواف–هرات د اورګاډي پټلۍ له لارې وارداتو کې پنځه برابره زیاتوالی راغلی
د هرات ځایي چارواکي وايي، د خواف–هرات د اورګاډي پټلۍ له لارې د توکو واردات د تېر کال په پرتله پنځه برابره زیات شوي.
د هرات د ولایت مقام ویاند، مفتی یوسف سعیدي وایي، هره ورځ دوه زره ټنه تجارتي توکي، په ځانګړي ډول سمنټ، کاشي، اوسپنه، نفتي او نور ساختماني توکي د هرات روزنک تمځای ته انتقالېږي.
د نوموړي په وینا، د بار تخلیې بهیر هره ورځ روان وي.
په همدې مهال، د هرات د صنعت او سوداګرۍ رئیس مولوي بشیرمحمد سیرت وایي، د اورګاډي پټلۍ کارونه د وارداتو او صادراتو د اسانتیا لپاره تر ټولو ښه لاره ده او ګڼې ستونزې يې راکمې کړې دي.
