مکسیکو کې د اورګاډي او بس د ټکر له امله لس تنه مړه او ۶۱ نور ټپیان دي.
د مکسیکو په مرکز کې د بار وړونکي اورګاډي او د مساپروړونکي بس د ټکر له کبله لس تنه مړه شوي او ۶۱ نور ټپیان دي.
ځايي چارواکي وایي چې دا خونړۍ پېښه د پلازمېنې مکسیکو ښار شمال لوېدیځ ته د اتلاکومولکو په لویه لاره رامنځته شوې ده. د دوی په وینا، ټکر دومره زورور و چې د بس ډېری مساپر یا پر ځای وژل شوي او یا یې سخت ټپونه اخیستي دي.
روغتیايي مسوولین وايي، د ټپیانو له ډلې د څو کسانو وضعیت د اندېښنې وړ دی او امکان شته چې د مړینې کچه لوړه شي. ټول ټپیان نږدې روغتونونو ته انتقال شوي او درملنه یې روانه ده.
تر اوسه د پېښې د اصلي لامل په اړه رسمي څرګندونې نه دي شوي، خو لومړنۍ څېړنې ښيي چې د اورګاډي د تګ په لاره کې د بس د نهاحتیاط سیګنال له امله دا ټکر رامنځته شوی وي.
باید وویل شي، چې په مکسیکو کې د سړکونو او اورګاډي د تګلارو ګډ کارېدنه وخت ناوخت د ورته مرګونو پېښو سبب کېږي. ځايي چارواکي ټینګار کوي چې د دغسې تراژیدیو د مخنیوي لپاره باید د ټرافیکي اصولو په مراعتولو او د خوندیتوب په تدابیرو جدي پاملرنه وشي.
