د امریکا ځانګړی استازی؛ اسراییل او سوریه د اوربند پر سر هوکړې ته رسیدلي
د سوریې لپاره د امریکا ځانګړي استازي «ټام باراک»ویلي چې اسراییل او سوریه د ترکیې، اردن او ګاونډیو هېوادونو په ملاتړ د اوربند هوکړې ته رسیدلي دي.
دغه څرګندونې ځانګړي استازي ټام باراک د جمعې په ورځ وکړې او زیاته یې کړه، چې دا هوکړه د سوریې د ګاونډيو هېوادو په مرسته شوې.
اسراییل د چهارشنبه په ورځ د دمشق پر وړاندې هوایي بریدونه ترسره کړل او د سوریې جنوب کې یې په حکومتي ځواکونو باندې حملې وکړې. اسراییل د دې بریدونو موخه د سوریې د دروز اقلیت ساتنه بللې.
باراک په ایکس خواله رسنۍ لیکلي: «موږ د دروز، بدو او سني مسلمانانو څخه غوښتنه کوو چې خپلې وسلې په ځمکه کېږدي او د نورو اقلیتونو سره یوځای د سوریې نوې او متحد هویت جوړولو ته کار وکړي.»
