په خوست کې امنیتي ځواکونو له لوري د موسی خېلو ولسوالۍ ګبر کهو خوله سیمه کې د یو لړ عملیاتو په ترڅ کې د نشه يي توکو یوه لویه کارخونه کشف او له منځه یوړل شوه. د نشه یي توکو په دې کارخونه کې د لیمه په نوم بوټي له پروسس وروسته ایف مواد جوړېدل چې له دې موادو بیا پوډر تولیدېدل. د یاد ولایت امنیتي چارواکو باختر آژآنس ته وویل چې د دغه قضیې په تړاو د څلورو کسانو نیول شوي چې د فراه ولایت د خاک سفید ولسوالۍ اوسېدونکي دي. ورته مهال د خوست امنیه قومندان حافظ عبدالرشید عمري له رسنیو سره په خبرو کې وویل چې دا ځل امنیتي ارګانونه د نشه یي توکو د سرچینو د له منځه وړلو په تکل کې دي او د امنیه قومندانۍ موخه هم د نشه یي توکو د سرچینو له منځه وړل دي.