نیپال کې د وروستیو سیاسي بدلونونو له امله، د دغه هېواد پخوانۍ قاضي القضات سوشیلا کارکي د لنډمهاله لومړۍ وزیرې په توګه لوړه وکړه. دا ګام وروسته له هغه پورته شو چې د پراخو لاریونونو په نتیجه کې لومړی وزیر شرما اولي استعفا ته اړ شو.

کارکي د خپلې دندې په لومړیو ورځو کې له ولسمشره د پارلمان د منحل کېدو غوښتنه وکړه، څو د معترضینو اوږدمهاله غوښتنه پوره کړي. ټاکل شوې چې نوې پارلماني ټاکنې د ۲۰۲۶ کال د مارچ په میاشت کې ترسره شي او تر هغې د لنډمهاله حکومت له لوري هېواد اداره شي.

د نیپال ګاونډی هند د دغه بدلون هرکلی کړی او د سولې او ثبات هیله یې څرګنده کړې ده. د هند لومړي وزیر نریندرا مودي پر ایکس پاڼه (پخواني ټویټر) کې لیکلي چې د سوشیلا کارکي د ټاکل کېدو مبارکي ورکوي او هند به د نیپالي ولس د پرمختګ او هوساینې ملاتړی پاتې شي.

یاد بدلونونه په داسې حال کې راځي چې د ټولنیزو رسنیو پر محدودیتونو د خلکو اعتراضونه لا هم دوام لري؛ اعتراضونه چې تر اوسه یې لږ تر لږه ۵۱ تنه وژلي او له ۱۳۰۰ زیات یې ټپیان کړي دي.