د امریکا ولسمشر ډونالډ ټرمپ د ملګرو ملتونو د عمومي شورا  غونډې پر مهال، د اوکراین له ولسمشر ولودیمیر زیلنسکي سره تر لیدنې وروسته وویل چې اوکراین کولای شي د خپلو اروپایي متحدینو په ځانګړي ډول د ناټو په مالي او سیاسي ملاتړ ټولې هغه سیمې بیرته ترلاسه کړي چې روسیې ترې نیولي دي.

ټرمپ ټینګار وکړ چې دا کار هغه وخت عملي کېدای شي چې اروپایي هېوادونه د زلېنسکي پراخ مالي ملاتړ وکړي او د اوکراین مشرتابه د صبر او اوږدمهاله تګلارې لار خپله کړي.

له دې وړاندې ټرمپ داسې څرګندونې کړې وې چې ښايي د جګړې د پای ته رسولو لپاره اوکراین اړ شي ځینې سیمې د سولې په بدل کې روسیې ته پرېږدي. د هغه اوسنی دریځ د تېر په پرتله یو څرګند بدلون بلل کېږي، ځکه دا ځل یې د اوکراین د بشپړې بریا او د ټولو نیول شوو سیمو د بېرته نیولو ملاتړ څرګند کړی.

ورته مهال د اروپایي هېوادونو یو شمېر مشرانو د ټرمپ د دې نوي دریځ هرکلی کړی او هغه یې د اوکراین د ملاتړ په برخه کې د یو ځواکمن پیغام په توګه یاد کړی دی. خو تر دې دمه کوم عملي اقدام یا د سیاست د رسمي بدلون نښې نه دي لیدل شوي.