د اوکراین جګړې  پایته‌رسولو په تړاو د نړیوالو هڅو په دوام، د امریکا ولسمشر ډونالډ ټرمپ ویلي، چې د روسیې له ولسمشر ولادیمیر پوتین سره یې ټیلفوني خبرې کړې دي.

ټرمپ په ټولنیزو رسنیو کې لیکلي، ټاکل شوې دا ځل به له ولادیمیر پوتین سره په مجارستان کې له نږدې هم وګوري.

د امریکا ولسمشر که څه هم دا نه دي څرګند کړي چې له پوتین سره به یې مخامخ لیدنه څه وخت وشي، خو ټینګار یې کړی چې نور باید د اوکراین جګړه پایته ورسېږي.

ډونالډ ټرمپ له تېرو څو میاشتو راهیسې د اوکراین او روسیې ترمنځ روانې جګړې د پای ته رسولو لپاره خپلې هڅې پراخې کړې دي، او تر دې مخکې یې هم څو ځلې له ولادیمیر پوتین سره ټیلفوني او مخامخ خبرې کړې دي.

د یادونې ده، د اوکراین جګړې په تړاو په الاسکا کې د ټرمپ او پوتین کتنه دواړو هېوادونو ګټوره بللې وه، خو د میاشتو په تېرېدو سره لا هم د جګړې د پای ته رسېدو نښې نه لیدل کېږي.

بلخوا د اوکراین ولسمشر ولادیمیر زلنسکي بیا ټینګار کړی، چې د روانې جګړې د پای ته رسېدو په اړه هر ډول مذاکرات باید د اوکرایني استازو په ګډون ترسره شي، ځکه پرته له هغوی دا ډول خبرې د منلو وړ نه دي.