د ننګرهار ولایت د کور او ښار جوړولو رئیس مولوي محمد نبي سعیدي وایي، د دې ریاست اړوند تخنيکي ټيم د ننګرهار پوهنتون د مرکزي لیلې د ۶ استوګنیزو  بلاکونو د بیا جوړونې  او رنګمالۍ چارې په چټکۍ روانې دي.

ښاغلي سعیدي وویل، د پروژې نږدې ۵۰٪ چارې تر دې دمه بشپړې شوې دي، چې د تخنیکي ټیم له خوا د یادې پروژې قراردادي شرکت ته د کیفیت لوړوالي په موخه لازمې لارښوونې او سپارښتنې شوې دي، تر څو پروژه په ټاکلي وخت او مطلوب کیفیت بشپړه شي.

د یادولو ده، چې د کور او ښار جوړولو وزارت اړوند رياستونه دوامداره د تعلیمي او عامه تاسیساتو د بیارغونې او ښاري خدمتونو د معیاري کولو لپاره څارنې کوي.