د ننګرهار اچين ولسوال ملا ابراهيم خيرالله، قومي مخورو او علماء کرامو په منځګړيتوب په عبدالخېلو سيمه کې د ماخېل، ډيلا او جعفر کورنيو ترمنځ د څو نسلونو سل کلنه دښمني ختمه او ترمنځ يې سوله وشوه.

په دې دښمنۍ کې د يادو کورنيو درې غړو ژوند له لاسه ورکړی وو او شپږ ټپيان شوي وو، ترڅنګ يې ميليونونه افغانۍ ورته نغدي زيان اوښتی وو.

د دې روغې جوړې پر مهال د ننګرهار او لغمان د ملکي او نظامي ادارو يو شمېر مسئولينو په خپلو خبرو کې له دواړو کورنيو مننه وکړه چې سوله يې وکړه ترڅنګ يې پر نورو کورنيو چې مخالفت او دښمني لري د سولې غږ وکړ.

د يادو دواړو کورنيو غړو له مسئولينو مننه وکړه چې په ميراث کې ورته پاتې دښمني يې ختمه او ترمنځ يې روغه جوړه وشوه.

 همدا راز يې ژمنه وکړه چې دوی او نور نسلونه به يې په سوله کې ژوند وکړي.
-