عدلیې وزارت: په تېره یوه کال کې ۱۴۰ تقنیني سندونه تسوید او تدقیق شوي.
د افغانستان اسلامي امارت د عدلیې وزارت وایي، چې د ۱۴۴۶ هجري قمري کال په اوږدو کې یې د قوانینو، اصولنامو، طرزالعملونو او لایحو په ګډون ۱۴۰ تقنیني سندونه تسوید او تدقیق کړي دي.
دغه وزارت په یوه خبرپاڼه کې ویلي، چې په همدې موده کې ۸۲ تقنیني اسناد د قرآن کریم آیتونو، نبوي احادیثو او د حنفي فقهې پر بنسټ تخریج او نهایی شوي دي. همداراز وزارتونو او امارتي ادارو ته ۱۵۵ قانوني مشورې وړاندې شوې دي.
د عدلیې وزارت د نړیوالو همکاریو په برخه کې د ۵۸ میثاقونو، معاهداتو او موافقتلیکونو مسودو په تړاو هم حقوقي نظرونه ورکړي دي.
دغه راز د یاد وزارت د تقنیني او دفاعي وکالت ستاژ برنامو له لارې ۲۳۰ تنه فارغ شوي او د تېر کال په ترڅ کې څه باندې ۸۶ زره رسمي اسناد لکه تذکرې، نکاح خطونه، تحصیلي اسناد او د محکمو پرېکړې هم تصدیق شوي دي.
یاد وزارت زیاتوي، چې د اسلامي امارت له حاکمیت راهیسې ۱۳ تقنیني سندونه د امیرالمؤمنین له توشېح وروسته په رسمي جریده کې خپاره شوي او ۵ نور نوي قوانین – د مالي محاسبې، د حاجیانو د ښوونکو، د مشاعرو د تنظیم، د خوراکي توکو او درملو د قاچاق د مخنیوي او د امارتي ادارو د عقودو قانون – هم توشېح شوي او ډېر ژر به خپاره شي.
