سپینبولدک کې د پاکستاني ځواکونو تازه بریدونو تاوتریخوالی زیات کړی؛ افغان لوري سمدستي غبرګون ښودلی.
د ډیورنډ فرضي کرښې ترڅنګ یو وار بیا د پاکستاني او افغان ځواکونو ترمنځ نښته راپارېدلې، چې د ملکي تلفاتو تر څنګ یې د دواړو هېوادونو اړیکې لا ترینګلې کړې دي.
د چهارشنبې په شپه د کندهار ولایت د سپینبولدک ولسوالۍ په «مازلګلۍ» او «لقمان» کلیو کې پاکستاني ځواکونو د هاوانونو ګولۍ توغولې، چې د سیمهییزو سرچینو په وینا، د څلورو ملکي افغانانو د وژل کېدو او څلورو نورو د ټپي کېدو لامل شوې ده. د ټپیانو په ډله کې ښځې هم شاملې دي چې اوس مهال په عینو مېنه روغتون کې تر درملنې لاندې دي.
د اسلامي امارت ویاند مولوي ذبیحالله مجاهد د پېښې پخلی کړی او ویلي یې دي چې پاکستاني اړخ د افغانستان پر خاوره بریدونه پیل کړل او افغان ځواکونو هم بې درېغه غبرګون وښود.
د سپینبولدک د مطبوعاتو مسؤول علي محمد حقمل ویلي، نښته له لسو بجو پیل او تر شپې یوې بجې پورې یې دوام وکړ. د سرچینو په خبره، جګړه هغه وخت پیل شوه چې پاکستاني ملېشو په ناڅاپي ډول د افغان پوستو پر لور لاسي بمونه وغورځول، چې وروسته پراخې نښتې رامنځته شوې.
ځايي عیني شاهدان ادعا کوي چې د افغانستان ځواکونو د برید پر مهال ځینې پاکستاني عسکر ژوندي نیولي، خو دا ادعا تر دې دمه د رسمي سرچینو له لوري نه ده تائید شوې.
یاده پېښه په داسې مهال کېږي چې له نږدې دوو میاشتو راهیسې د اوربند تر سیوري لاندې د دواړو هېوادونو اړیکې بیا بیا د ورته سرغړونو له امله ترینګلې پاتې شوې دي. پاکستان په تېرو اوونیو کې د سپینبولدک او څنډو سیمو په لور څو ځل د هاوان او توپچي بریدونه کړي چې د ملکي افغانانو ژوند ته یې تلفات اړولي دي.
د دواړو هېوادونو ترمنځ د اعتماد د رامنځته کېدو لپاره مذاکرات په قطر، ترکیه او تازه په سعودي عربستان کې ترسره شوي، خو تر اوسه هېڅ پایله نه ده اعلان شوې. اسلامي امارت ټینګار کړی چې د پاکستاني پلاوي غیرمسوولانه چلند د مذاکراتو د ناکامۍ لوی لامل دی.
په سیمه کې اوس وضعیت د ارامېدو په حال کې بلل کېږي، خو ځایي اوسېدونکي وايي چې د شپې د جګړې له امله سیمه لاهم د "کړس کړس ډزو" له غږونو نه ده رغېدلې او خلک شدید اندېښمن دي.
د پېښې په تړاو تر اوسه د پاکستان حکومت رسمي څرګندونې نه دي خپرې کړي.
