د هېواد د بهرنيو چارو وزارت په يوې اعلاميې کې د ايران په بندر عباس کې د پرونۍ چاودنې له امله ژوره خواشيني څرګنده کړې ده.
د ايران له حکومت او ایرانيستاني وګړو، په ځانګړي توګه د وژل شويو او ټپيانو له کورنيو سره يې خواخوږي او تسليت څرګند کړی دی.
اعلاميه کې راغلي چې اسلامي امارت او افغان ملت په دې غمجنو شېبو کې د ايران حکومت او ملت ترڅنګ ولاړ دي او خپله بشپړه خواخوږي او ملاتړ څرګندوي.
د ايران د بندر عباس په شهيد رجايي سيمه کې د پرونۍ چاودنې له کبله د وروستیو خپرو شوو ارقامو له مخې ۲۵ تنه مړه او د ټپیانو شمېر تر نهه سوو(۹۰۰) پورته ښودل شوی.
