زهران ممداني د نیویارک لومړني مسلمان ښاروال شو.
د ډیموکراټیک ګوند ځوان سیاستوال زهران ممداني د ښاروالۍ په وروستیو ټاکنو کې له نیمايي زیاتې رایې وګټلې او د نیویارک د تاریخ لومړنی مسلمان ښاروال وټاکل شو.
د ۳۴ کلن ممداني په بریا سره هغه وتوانېد چې له خپل اصلي سیال انډریو کوومو څخه مخکې شي. ممداني د رایو له ۵۰ سلنې ډېرې ترلاسه کړې، په داسې حال کې چې کوومو، د شتمنو ملاتړ لرونکی نوماند، یوازې شاوخوا ۴۳ سلنه رایې ترلاسه کړې. د جمهوري غوښتونکي ګوند استازي کرتیس اسلیوا بیا له ۵ سلنې څخه کم ملاتړ خپل کړ. یادو ټاکنو کې نږدې ۱.۸ میلیونه خلکو ګډون کړی و.
کارپوهان دا بریا د امریکا د سیاسي صحنې د بدلون نښه بولي او وایي چې د ممداني ټاکنه د ډیموکراتیک ګوند دننه د مترقي نسل د پیاوړتیا څرګندونه کوي.
زهران ممداني چې کورنۍ یې هندي ریښې لري، د کارګرانو او منځنۍ طبقې د حقونو یو فعال مدافع ګڼل کېږي. هغه د خپل کمپاین پر مهال د ټولنیز عدالت، د کورونو د وضعیت ښه والي او د ژوند د لګښت د راکمولو ژمنې وکړې — هغه موضوعات چې د ځوانو رایه ورکوونکو پراخ ملاتړ یې ترلاسه کړ.
ممداني تر دې وړاندې د نیویارک ایالتي اسمبلۍ غړی و او د مترقي دریځونو او د دودیزو ګوندي سیاستونو د نیوکې له امله پېژندل کېده. د هغه بریا اوس د نیویارک د سیاسي تاریخ یوه نوې پاڼه پرانیزي، چې پکې د بېلابېلو توکمونو او ټولنیزو ډلو استازیتوب ته نوې مانا ورکول شوې ده.
