د هند د بهرنیو چارو وزارت ویلي چې کابل او نوی ډیلي پرېکړه کړې چې په خپلو سفارتونو کې د سوداګرۍ ځانګړي استازي وګماري. د هندي رسنیو د معلوماتو پر بنسټ، د دغه وزارت یو چارواکي «انند پرکاش» ویلي چې د پرېکړې له تطبیق سره به افغانستان وکولی شي په نږدې راتلونکي کې خپله سوداګریزه اتشه هند ته معرفي کړي.

د کندهار د کرنې، اوبولګولو او مالدارۍ ریاست چارواکي اټکل کوي چې سږ کال به په دغه ولایت کې د پنبې تولید شاوخوا ۸ زره او ۶۰۰ ټنو ته ورسېږي.

په کابل کې د امام ابوحنیفه رحمه ‌الله څلورم ملي او نړیوال نندارتون کې د ننګرهار وادې کرنیز شرکت خپل کرنیز تولیدات او پروسس شوې محصلات نندارې ته وړاندې کړل.

د مالیې وزارت په خپره کړې خبرپاڼه کې راځي چې د دې وزارت وزیر ملا محمد ناصر اخوند د روان کال د لړم میاشتې په ۲۵مه د افغانستان د سوداګرۍ او پانګونې خونې مدیره پلاوي له غړي خان جان الکوزي او هېواد ته د درملو وارداتو له یو شمېر سوداګرو سره ځانګړې ناسته وکړه.

مالیې وزارت په یوه خبرپاڼه کې وايي چې د افغانستان اسلامي امارت د ریاست الوزرا‌ء اقتصادي معاونیت د هدایت پر بنسټ؛ یاد وزارت له (۱۴۴۷/۵/۲۱) نېټې څخه تر راتلونکو درېیو میاشتو پوري له پاکستان څخه را واردېدونکي درمل محصولوي او تر یادو ترېیو میاشتو وروسته را راورېدونکي درمل نه محصولوي.

د هرات ولایت د اسلام‌کلا په سرحدي ګمرک کې هغه ‌خوراکي توکي چې تاریخ‌تېر او یا هم کیفیت‌لاندې تشخیص شوي، د ولایتي ادارو او د ګمرک د باصلاحیته استازو په حضور کې سوځول شوي دي. د مالیې وزارت په خبرپاڼه کې راغلي چې په یادو عملیاتو کې شاوخوا‎ (۲۱،۴) ټنه تاریخ‌تېر خوراکي توکي چې په ګمرکي هنګرونو کې مېشت وو، له منځه یوړل شول.

د ریاست‌الوزرا اقتصادي مرستیال ملا عبدالغني برادر اخوند د پارندې برېښنا بند د پرانیستې په موخه پنجشېر ولایت ته تللی.

هلمند ولایت کې د کبانو فارم لرونکو ټولنې مسولین وایي چې په دې ولایت کې د ماهیانو د پالنې صنعت مخ پر وده دی او دغه ولایت کې هره میاشت ۳۰ زره کیلو ګرامه د کبانو غوښه تولیدیږي.

د افغانستان د کانونو او پټرولیم وزارت خبر ورکړی، چې د غزني ولایت د زرکشانو د پولي میتال کان د اکتشاف، استخراج او پروسس لپاره د یوه خصوصي شرکت سره رسمي هوکړه‌لیک لاسلیک شو.

د افغانستان اسلامي امارت د ریاست‌الوزراء اقتصادي معاون ښاغلي ملا عبدالغني برادر اخوند په مشرۍ پرون د ملي تدارکاتو کمېسیون نوبتي غونډه وشوه. په دې غونډه کې ۱۸ پروژې د منظورۍ لپاره وړاندې شوې، چې له بحث او ارزونې وروسته یې شپږ پروژې د ټولټال ۳ میلیاردو او ۳۲۱ میلیونو افغانیو په ارزښت منظورې شوې.