د لغمان ولايت وياند عبدالمالک نيازي د ياد ولايت د کرنې ریاست د مسؤلانو له قوله ويلي؛ چې ددې ولایت په قرغیو ولسوالۍ کې د ملګرو ملتونو د کرنیز پراختیایي پروګرام په لګښت، د UNDP موسسې لخوا د کرنې ریاست په هڅو د ۹۵ میلیونه ۲ لکه ۸۰ زره افغانیو په ارزښت په ۳۰ هکتاره ځمکه کې د بیرې او عنابو ځنګل کرل کیږي، چې د سیمې د ښکلا ترڅنګ به د شاتو مچیو روزنې او د شاتو تولید ته ښه زمینه برابره کړي. ښاغلی نيازی وايي یاد ځنګه کې به ۵۰ زره ونې کینول شي چې هم مهاله ورسره سلګونو ځوانانو ته د کار زمينې برابرول ترڅنګ به ځمکې د سیلابونو له خطر څخه وژغورل شي او په راتلوونکي کې به په دې ولايت کې د بیرو تولید هم زیات شې.

د بغلان ولايت د برښنا ریاست مسؤلان وايي، چې په تیرو نهو میاشتو کې مو څه باندې ۶۷۱ میلیونه افغانۍ عواید راټول کړي دي. د بغلان ولايت د برښنا ریاست د نشراتو مسؤل رامین خرم رسنيو ته وویل: د روان ۱۴۰۳ کال په نهو میاشتو کې مو د برښنا د لګښتونو له درکه، ۶۷۱ میلیونه، ۳۵۹ زره او ۲۱ افغانۍ راټولې او د دولت خزانې ته سپارلې دي.

د کونړ ولایت وياند عبدالغني مصمم د ياد ولايت د والي الحاج مولوي قدرت الله ابو حمزه له قوله ويلي، چې د ولسونو او ولایتي ادارې غوښتنو په اساس ټولګټو چارو وزارت له خوا نورګل او سرکاڼو ولسوالیو کې د کونړ پر سیند پراته د زیړي بابا او پشد زیانمن شوي پلونه بیارغول کېږي. سرچينې ويلي چې دغه پلونه د خراب کېفیت له امله کلونه وړاندې تخریب شوي و،چې د ولسونو ستونزو هوارۍ په موخه د اسلامي امارت له خوا بیا رغول کېږي.

د ابو او انرژۍ وزارت مطبوعاتي دفتر په خپره شوې خبرپاڼه کې ويلي؛ په روان ۱۴۰۳ کال کې د پکتیا په مرکز ګردیز، زرمت او روحاني بابا ولسوالیو کې د ۳۸ میلیونه، ۹۳۵زره او ۹۳۲ افغانیو په لګښت ۲۱ بېلابېلې پروژې؛ د اف.اي. او، یونیسکو او یو.این. ډي. پي موسسو له لوري پلي شوي دي. سرچينې ويلي چې په يادو پروژو کې د سربندونو، کانالونو، حوضونو، کاریزونو، د څښاک اوبو د څاګانو جوړونه، بیارغونه او پاکارۍ شاملې دي.

د هلمند ولايت وياند مولوي محمد قاسم رياض وايي چې په دغه ولايت کې د عالیقدر امیرالمؤمنین حفظه اللّٰه د ځانګړي فرمان پر اساس د راستنېدونکو کډوالو لپاره ښارګوټی جوړېږي چې د ځمکې د برسۍ کارونه يې هم ترسره شوي دي. ښاغلی رياض وايي چې په هلمند کې ټاکل شوې کمېټې د راستنېدونکو کډوالو لپاره د ۲۱۵ عزم قول اردو او د مهاجرينو زاړه ښارګوټي تر څېرمه د دوه هغو سيمو څخه ليدنه او برسي ترسره کړې چې شايد په ياد ولايت کې به په دغو سيمو کې د کډوالو لپاره پرې ښارګوټی جوړ شي.

د کونړ ولایت وياند عبدالغني مصمم وایي، تیر ۲۰۲۴ م.کال کې د اسلامي امارت او مرستندویه موسیسو له خوا د کونړ ولایت په بیلابیلو ولسوالیو کې د (۲۸۳۵۸۸۰۰۰) افغانیو په ارزښت ۲۳۹ پروژې پیل شوي، چې له ډلې څخه يې ۱۲۹ پروژې بشپړې او د ۱۱۰ نورو پروژو چارې لا دوام لري. ښاغلي مصمم وویل ددغو پروژو پر مټ زرګونو کسانو ته د لنډ مهاله کاري فرصتونو برابرېدو ترڅنګ روغتیا، کرنې، پوهنې اوبو رسولو او نورو بېلابېلو برخو کې پرمختګونه رامنځته شوي، چې په ټولنیزو او اقتصادي برخو کې به مهم رول ادا کړي.

د کلیو بیارغونې او پراختیا وزارت مطبوعاتي دفتر په خپره شوې خبرپاڼه کې راغلي چې د ولايتي ریاستونو په همغږۍ يې؛ په لغمان، کندهار، فراه، غزني، هرات، پکتیکا، سرپل، غور، خوست، هلمند، جوزجان، نیمروز، بدخشان، پنجشیر، ارزګان او میدان وردګو ولايت کې (٤٠٣٠٤) اړمنو کورنیو ته نقدې پیسې، د روغتیا ساتنې کیټونه او خوراکي توکي وویشل شول. هېره دې نه وي چې له دې وړاندې هم د ياد وزارت له لوري د هېواد په ټولو ولايتونو کې د سړې هوا په رارسېدو سره د خوراکي او غیرې خوراکي توکو اړينې مرستې ترسره شوي دي.

د کډوالو او بېرته راستنېدونکو چارو وزارت مطبوعاتي دفتر پولیس راډیو ته په رالېږل شوې خبرپاڼه کې ويلي؛چې د روان کال په تېرو دریو تلې، لړم او لېندۍ میاشتو کې د هېواد په ۲۹ ولايتونو کې ۲۳ زره او ۵۴۲ بېځایه شویو، راستنو شویو، د طبیعي پېښو له امله زیانمنو شویو، بې وزلو، معیوبو، اړمنو او مستحقو کورنیو سره مرستې شوې دي. خبرپاڼه کې راغلي چې په مرستو کې خوراکي، نغدي او روغتیایي کڅوړې، جامې، خيمې، د اوبو ټانکرونه، ودانیز،د پخلنځي وسايل او د شیدو وزې شاملې وې.

د کندهار ولايت کرنې اوبو لګولو او مالدارۍ رياست د مطبوعاتو مسؤل محمد حنيف حقمل وويل، چې د کرنې اوبو لګولو او مالدارۍ ریاست تر چتر لاندې د یو تن سوداګر له لوري، پر ۲.۵ جریبه ځمکه د ۳۰۰ زره امریکایي ډالرو په ارزښت یو ژوبڼ جوړ شو چې پکې به ۵۰ ډوله وحشي او اهلي څاروي ساتل کیږي. د ښاغلي حقمل په وينا، چې ياد ژوبڼ د مخ پر ورک کیدونکو ژویو د ختمیدو د مخنیوي په پار جوړ شوی دی.

د بادغیس ولايت ا.ق وياند صديق اللّٰه صديقي وايي چې د اميرالمؤمنين حفظه اللّٰه د فرمان پر اساس او ددې قومندانۍ د نشه يي توکو پر وړاندې د مبارزې مدیریت له لوري په ۵۰ تنو سوالګرو چې ښځې پکې هم شاملې دي د خوارکي توکو مرسته وويشل شوه. د صديقي په وينا په ويشل شوو خوراکي توکو کې اړين خوراکي توکي شامل دي.