د هلمند ولايت د پوليسو وياند ملا عزت اللّٰه حقاني وايي چې ددې قومندانۍ اړوند د پولیسو د ښوونيز او روزنيز مرکز له ۱۱مې دورې څخه ۷۰۲ تنه مجاهدين د خپلو نظامي او عقيدوي زده کړو تر بشپړېدو وروسته فارغ شول. همدا راز د فارغ شويو پوليسو له ډلې څخه، ۵۳۱ تنه د هلمند او پاتې ۱۷۱ تنه يې د نيمروز ولايت دي چې له دې سره د اسلامي امارت له حاکميت نه را وروسته تر دا مهاله، له دې اکاډمۍ څخه ۶ زره پوليس فارغ او ټولنې ته د خدمت په موخه وړاندې شوي دي.

د اميرالمؤمنين حفظه اللّٰه د حکم پر اساس،د کورنیو چارو وزارت د پالیسۍ او ستراتيژۍ معین مولوي عبدالحق مخدوم له لوري مولوي سمیع اللّٰه حزب اللّٰه د تخار لپاره د نوي والي په توګه معرفي او د يوې غونډې په ترڅ کې د یاد ولایت مسؤلانو ته ور وپېژندل شو. په معرفت غونډه کې د کورنیو چارو وزارت د پالیسۍ او ستراتېژۍ معین مولوي عبدالحق مخدوم په خپلو خبرو کې ويلي چې تغیر او تبدیل د نظام یو اصل دی. ښاغلي معين د مخکيني والي کړنې ستايلي او نوي والي ته يې په چارو کې د اللّٰه ج له درباره د ښه خدمت غوښتنه کړې. ياده دې وي چې مولوي سمیع اللّٰه حزب اللّٰه له دې وړاندې د کندهار ولايت د امنیه قومندان په توګه دنده ترسره کوله.

د احصايې او معلوماتو ملي ادارې وياند وايي، د نفوسو د احوال ثبتولو خدمتونو ریاست د روان کال په سلواغه میاشت کې ۳ زره او ۷۴۷ بهرمېشتو هېوادوالو ته د کاغذي تذکرې غیرې حضوري خدمتونه وړاندې کړي دي. وياند وايي ددې ترڅنګ بيا یاد ریاست په کابل ښار کې تېره میاشت ۹ زره او ۱۸۵ هېوادوالو ته په کاغذي تذکرو کې د اصلاحاتو راوستو، ۱۰ زره او ۶۳۴ کسانو ته د کاغذي تذکرې د تایید او ۷ زره او ۱۷۲ کسانو ته د نوې او مثنی تذکرې د وېش اوکاغذي تذکرو دلغوه کولو خدمتونه وړاندې کړي دي.

د کندهار ولايت د پوليسو وياند ملا اسدالله جمشيد وايي، د نشه یي توکو پر وړاندې د مبارزې مدیریت له لوري په تېره یوه اونۍ کې د نشه یي توکو پر ضد ۵۴ بريالي عملیات ترسره شوي دي. د جمشيد په وينا په دغو عملياتو کې د ۸ تنو تورنو د نيول کېدو ترڅنګ؛څه اندازه نشه يي توکي او ۵ سیټه غلا شوي موبایلونه هم نیول شوي دي. همدا راز په یادوو عملیاتو کې ۸ جريبه ځمکه د کوکنارو له کښت څخه پاکه شوې او ۱۱۴ تنه په نشه یي توکو روږدي کسان د درملنې په موخه روغتون ته ورپېژندل شوي دي.

د ښارواليو چارو سمون عمومي رياست په خپره شوې خبرپاڼه کې راغلي، فراه ښاروالۍ د ښار د زرغونتیا او سمسورتیا په موخه ۳ معیاري ګلخانې جوړي کړې،چې په یادو ګلخانو کې به مثمر او غیر مثمر نیالګي روزل کیږي. سرچينه زیاتوي چې په دغو ګلخانو کې به د بېلابېلو ډولونو نیالګي پالل کیږي، چې وروسته به د ښار په مهمو برخو کې کېنول شي.

د بلخ ولایت د والي وياند حاجي زيد پوليس راډیو ته وویل چې د ياد ولايت د والي په ځانګړې لارښوونه، د بلخ ولايت د علماوو شوری د رئیس په مشرۍ یوه ۹ کسیز پلاوي ازبکستان ته سفر کړی او د هغه هیواد له چارواکو سره یې کتلي دي. د حاجي زيد په خبره، په دغه غونډه کې د ګډ بازار، ټرانزیټي وسایطو ته د اجازې ورکولو، د ګډ بازار روغتون ته په پېژندپاڼې سره د عاجلو ناروغانو وړلو اجازې او د وېزې د صدور په برخه کې د اسانتیاوو رامنځته کولو په اړه خبرې شوې دي. سرچينه زیاتوي، په دغه غونډه کې د یو لړ نورو ورته مهمو مسایلو په اړه دواړو لورو یو لړ پرېکړې هم کړې دي.

د صنعت او سوداګرۍ وزارت په خپره شوې خبرپاڼه کې راغلي،چې د ياد وزارت چارسمبال وزير الحاج نورالدین عزیزي په الماتا ښار کې د افغان سوداګرو لپاره د یوه سوداګریز مرکز د جوړولو، د دواړو هېوادونو د سوداګرو تر منځ د قراردادونو په تړاو د ترسره شویو ژمنو د عملي کېدو، په افغانستان کې د قزاقي سوداګرو د پانګونې او په کابل کې د قزاقستان د سفارت ‏له خوا افغان سوداګرو ته د ویزو د صادرولو په تړاو د آسانتیاوو رامنځته کېدو په اړه ګټور بحثونه ترسره کړي دي.

د خوست ولايت ا‌ق وياند طاهر احرار وايي، د اولې امنیتي حوزې د مسؤلانو او د سیمه ییزو قومي مشرانو په منځګړیتوب، د جوال شاه او حاجي والبیک تر منځ ۳۰ کلنه دوښمني چې یو کس پکې وژل شوی و، د دواړو لوریو په رضايت سره حل او په دوستۍ بدله شوه. په همدې مراسمو کې بيا یو شمېر ګډونوالو له حکومت څخه مننه کړې، چې د خلکو اساسي ستونزو ته پاملرنه کوي او د خلکو ترمنځ د لسیزو راهیسې ژور خفګانونه په مینه او دوستۍ بدلوي.

د پکتيا ولايت د پوليسو وياند منيب ځدران پوليس راډیو ته وویل: چې ددې قومندانۍ د پاسپورټ آمریت لخوا خلکو ته د خدمت او خپلو پېرودونکو ته د اړتياوو پر اساس، ١٠٩٢٤ جلده پاسپورټونه په انلاین او ١٦٤٢ نور په افلاین ډول د عاجلو ناروغانو، په بورسيو باندې تلونکو زده کړيالانو، ویزه لرونکو او دولتي کارمندانو ته اجرا کړي. هېره دې نه وي چې په ټول هېواد کې اوس مهال د پاسپورټ امريتونو له لوري ټولو هېوادوالو ته اسانتياوې برابرې شوې دي.

د احصایې او معلوماتو ملي ادارې وياند محمد حليم رافع پوليس راډیو ته وویل؛ روان کال په هېواد کې په لومړي ځل په ۱۵ ولایتونو کې د پنبې سروې ترسره کړې ده، چې پر اساس یې په ټول هېواد کې ۱۵۹ زره مټریک ټنه پنبه تولید شوې ده. رافع زياتوي د دې سروې ارقام ښيي چې د تېر کال په پرتله د پنبې په تولید کې ۳۰ سلنه زیاتوالی راغلی او تر ټولو ډېره پنبه (۸۰ زره مټریک ټنه) په هلمند ولایت کې، په بلخ کې څه باندې ۳۴ زره مټریک ټنه، کندهار کې څه‌باندې ۱۱ زره مټریک ټنه، جوزجان کې نږدې ۱۱ زره مټریک ټنه او ننگرهار ولایت کې څه باندې ۵ زره مټریک ټنه پنبه تولید شوې ده.