د نشه يي توکو پر وړاندې د مبارزې معینیت وياند علا محمد مدني پوليس راډیو ته وویل،چې ددې معينيت د کشف تخنیکي تدقیق ریاست اړوند د راډیویي کشف او پیسو د تطهیر مدیریت منسوبینو لخوا د کابل ښار ۱۷مې او ۵مې حوزې له اړوندو سيمو څخه د نشه یي توکو د خرڅلاو په تړاو ۳ تنه له ۱.۹۰۰ کیلو ګرامه شیشې سره یوځاي نیول شوي دي.

د پکتـيا ولايت د پوليسو وياند منيب ځدران وايي،د ا.ق اړوند د ډنډې پټان ولسـوالۍ په ستیا سیمه کې د نشه یي توکو پر وړاندې د مبارزې پوليسو لخوا د یو کشفي راپور پر اساس، ٣٤٣٠ دانې ټابلين نشه يي ګولۍ، چې په یو عراده زرنج کې له پاکسـتان څخه افغانستان ته د درې تنو قاچاق وړونکو له لوري را قاچاق کیدلې کشف او ونیول شوې. په ورته مهال کې بيا په څمکنـیو ولسـوالۍ کې هم، یو تن له ٥٦ عددو ټابلين ګولیو سره یو ځای لاس په لاس نیول شوی دی.

د ترانسپورت او هوايي چلند وزارت په يوې خپرې شوې خبرپاڼه کې،نن( يک شنبه د سلواغې ۲۱ نېټه) په کابل،ميدان وردګ،لوګر، پکتيا، خوست، پکتيکا، غزني، جوزجان، بلخ، پروان، بغلان، پنجشير، هرات، فراه، هلمند، نيمروز، کندهار، ارزګان، زابل، دايکندي، غور بادغیس، فارياب او سرپل کې د تيز باران او واورې د ورېدو اټکل کړی. همدا راز ياد وزارت د هېواد په بيلابيلو ولايتونو کې د باران کچه د ۱۵ څخه تر ۳۵ ملي مترو او د واورې د ورېدو کچه د ۱۰ څخه تر ۴۰ سانتي مترو پورې اټکل کړې ده.

د خوست ولايت د پوليسو وياند طاهر احرار وايي،ددې قومندانۍ اړوند د ډایاک امر مولوي محمد طاهر خالد په مشرۍ د یو شمېر قومي مشرانو په منځګړیتوب،د مرکز اړوند ورغه سیمه کې د ګلدات خان او عیدات خان کورنيو ترمنځ ۲۳ کلنه مرګونې دوښمني چې پکې یو تن وژل شوی و، د دواړو کورنيو په رضایت سره حل او په دوستۍ بدله شوه.

د نورستان ولايت وياند فريدون صميم وايي چې ددې ولايت د والي الحاج قاري زين العابدين عابد په سپارښتنه،د lOM مؤسسې له لوري، د وايګل ولسوالۍ په ژک سيمه کې د اتو هغو زيانمنو شويو کورنيو سره د کور د اړينو وسايلو مرسته وشوه چې څو ورځې وړاندې يې کورونه په اورلګېدنه کې زيانمن شوي و.

د هلمند ولايت مقام وياند مولوي محمد قاسم رياض وايي،چې ددې ولايت په سنګين ولسوالۍ کې د عامې روغتیا وزارت د چارسمبال وزير ښاغلي مولوي نور جلال جلالي له لوري او د ياد ولايت د والي الحاج مسلم کندوزي او د يو شمېر ولايتي مسؤلانو په حضور کې د ۲۶ ميليونونو افغانيو په ارزښت،يو باب ۳۰ بستريز روغتون چې ۲۴ خونې لري ګټې اخیستنې ته وسپارل شو. بايد وويل شي چې ياد روغتيايي مرکز د عامې روغتیا او ولايتي مسؤلانو په ګډې همغږۍ او د يونيسيار مؤسسې په مالي لګښت جوړ او ګټې اخیستنې ته وسپارل شو.

د ملي دفاع وزارت مطبوعاتي دفتر په خپره شوې خبرپاڼه کې ويلي؛ چې ددې وزارت مربوط د ۲۰۵ البدر قول اردو اړوند د ثقیله اسلحو په ورکشاپ کې اته ضربه اوبوس توپونه د مسلکي او تخنیکي انجنیرانو په هڅو چې د تېرې ادارې پر مهال تخریب شوي وو ترمیم او ګټې اخیستنې ته وسپارل شول. هېره دې نه وي چې تر دې وړاندې هم په یاد ورکشاپ کې په زیات شمیر دهشکې، زیکویک او ډي سي توپونه بیا ځلې ترمیم او ګټې اخیستنې ته سپارل شوي دي.

د هلمند ولايت وياند مولوي محمد قاسم رياض وايي، چې ددې ولايت د مارجې ولسوالۍ د ولسوال،ا.قومندان او د يادې ولسوالۍ د ځينو نورو امارتي مسؤلانو،علماء کرامو او قومي مشرانو په منځګړيتوب د ۲ کورنيو ترمنځ د ځمکې د ويش پر سر رامنځته شوې، هغه دوه کلنه دوښمني حل شوې چې پکې ۲ تنه وژل شوي وو. ښاغلی رياض وايي چې پرېکړه د دواړو کورنيو په رضایت سره حل او د وژل شوو کسانو کورنيو ته ۳۳ لکه افغانۍ د مالي جبران په توګه د مقابلې کورنۍ له لوري ورکړل شوې.

د ریاست‌ الوزراء اقتصادي مرستیال ښاغلي ملا عبدالغني برادر اخوند، تېره ورځ په کابل کې د ملګرو ملتونو د مرستندویه ماموریت «یوناما» له مرستیال ایندریکا راتوات سره کتلي دي. د ریاست‌ الوزراء اقتصادي معاونیت د معلوماتو له مخې، ښاغلي ملا عبدالغني برادر اخوند په افغانستان کې د طبیعي پېښو پر مهال زیانمنو شویو افغانانو ته د «یوناما» له لوري د رسول شویو مرستو څخه مننه کړې. سرچينې ويلي ښاغلي برادر اخوند له یاد بنسټ څخه غوښتي چې په افغانستان کې دې د بشري مرستو په ويشنه کې رونټيا رامنځته کېدو ترڅنګ؛خپلې مرستې پراختیايي برخو ته هم واړوي؛ ترڅو هېوادوالو ته په بيلابيلو برخو کې د سهولتونو زمينه رامنځته شي. په همدې حال کې بيا اندریکا راتوت ډاډ ورکړی او ويلي دې چې مونږ به د اسلامي امارت سره په ګډې همغږۍ خپلو پراختیایي او بشري مرستو، د خصوصي سکټور ملاتړ او افغان بزګرانو ته د کوکنارو د بدیل کښت برابرولو سربېره په یو شمېر نورو برخو کې هم مرستو ته دوام ورکړو.

د ملي دفاع وزارت مطبوعاتي دفتر په خپره شوې خبرپاڼه کې راغلي،چې ددې وزارت د بېلابېلو قطعاتو او سیمه‌ ییزو قول اردوګانو ٤١٢ تنه ځوان منسوبين د عبدالله بن مسعود (رض) د جګړه‌ ایزو ګډو زده کړو،د قومندانۍ له درې میاشتنیو مسلکي زده کړو څخه د یو لړ مراسمو په ترڅ کې فارغ او ټولنې ته د خدمت په موخه وړاندې شول.