د لغمان ولایت مقام په خپله وروستۍ خبرپاڼه کې وايي چې د دې ولایت والي شیخ شیر احمد حقاني د حوادثو ریاست له رییس قاري خیرمحمد غازي سره یوځای د ولایتي روغتون له هغه ټپیانو لیدنه کړې چې د تېرې شپې په زلزلو کې یې ځاني زیانونه لیدلي دي.

د هيواد ختیځو ولایتونو، په ځانګړې توګه د کونړ او ننګرهار په غرنیو سیمو کې تېره شپه د ۶ درجې زلزلې له امله درنه مرګ ژوبله او مالي زیانونه رامنځته شوي دي.

د کرنې، اوبو لګولو او مالدارۍ وزیر مولوي عطاءالله عمري په مشرۍ د لوړپوړي دولتي پلاوي په ګډون، پکتیا ولایت کې د سوېل ختیځ زون په کچه د ځنګلونو د ساتنې او د شنو ونو وهلو د مخنیوي لپاره پراخه ولسي غونډه جوړه شوه.

د هرات د امنیې قوماندانۍ چارواکي وايي، د انجیل ولسوالۍ پولیسو د ځانګړو پلټنو په ترڅ کې یو موټر- چې څه موده وړاندې د دغې ولسوالۍ له اړوند سیمو څخه غلا شوی و- بېرته ترلاسه کړی دی.

د المپيک، بدني روزنې او ورزش عمومي رياست اړوند د پهلوانۍ ملي فیډرېشن له لوري د هېواد له ۱۲ ولايتونو د ۲۰۰ پهلوانانو ترمنځ د دې رياست په دوه زره ۵۰۰ کسيز جمنازيم کې د پهلوانۍ ملي لوبډلې ټاکنيزې سيالۍ پيل شوې.

د افغانستان کرېکټ بورډ د غوراوي کمېټې له خوا د نوولس کلنې ملي لوبډلې لپاره ۲۹ کسیز نوملړ ټاکل شوی دی. ټاکل شوې ده چې دغه لوبډله د ۲۰۲۴م کال د اګست له وروستیو څخه د ۲۰۲۵م کال تر اپرېل پورې په روزنیزو کمپونو، دوه اړخیزو او درې اړخیزو سیالیو، او د ۱۹ کلنو د اسیا جام په ګډون ګڼو نړیوالو پروګرامونو کې ګډون وکړي.

کورنیو چارو وزارت اعلان کړی چې هغه موټر چې د افغانستان خلاف وارد شوي او لاهم ثبت شوي نه دي، باید د کابل ښار نه ووځي او په هر ولایت کې د ترافیک ادارو څخه ځانګړي سټېکرونه ترلاسه کړي، څو یوازې په هماغه ولایت کې وګرځي.

هرات ښار کې د ترافیکي ګڼه‌ګوڼې کمولو او ښاري ښکلا زیاتولو په موخه، هرات ښار کې تر ځمکې لاندې د یوه سړک د جوړولو چارې پیل شوې.

د کورنیو چارو وزارت د نشه يي توکو پر وړاندې د مبارزې معینیت د ننګرهار ولایت اړوند د نشه يي توکو پر وړاندې د مبارزې مدیریت له خوا د یاد ولایت له مختلفو سیمو څخه ۷۶ تنه روږدي د درملنې په موخه راټول شوي دي.

د افغانستان اسلامي امارت د عدلیې وزارت اعلان کړی چې د مشاعرو د تنظیم قانون د امیرالمؤمنین حفظه الله له توشیح وروسته د رسمي جریدې په ۱۴۶۹مه ګڼه کې خپور شوی دی.