د ایران د بهرنیو چارو وزیر عباس عراقچي د یکشنبې په ورځ (د تلې ۲۰مه) اعلان وکړ، چې ایران د شرم‌الشیخ سرمشریزې د بلنې هرکلی کوي، خو د دې هېواد ولسمشر مسعود پزشکیان او نوموړی له هغو مشرانو سره د لیدو اراده نه لري، چې د فلسطیني ولس پر وړاندې یې بریدونه کړي او لا هم ګواښونه کوي.

الجزیرې راپور ورکړی، چې د فلسطین نامتو خبریال صالح الجفراوي د غزې په صبرا سیمه کې د وسله‌والو په ډزو کې وژل شوی دی.

ملګرو ملتونو تازه ویلي چې د بودجې کمښت له کبله به په راتلونکو میاشتو کې په نهو هېوادونو کې د خپلو سوله ساتو ځواکونو شمېر ۲۵ سلنه راکم کړي.

د اسراییلي ځواکونو جنګي الوتکو د اوربند تر اعلان وروسته د غزې ښار لوېدیځ لور ته په یوه کور هوايي برید کړی دی. د سیمه‌ییزو سرچینو په وینا، د برید له امله ځینې زغروال موټر هم د اسراییلي ځواکونو لاس ته ورغلي، خو د مرګ‌ژوبلې په اړه تر اوسه کره معلومات نه دي خپاره شوي.

د امریکا مرکزي قوماندانۍ (سنټکام) په یو بیان کې ویل شوي چې د اکټوبر په دویمه نېټه په سوریه کې د یو دقیق هوايي برید په ترڅ کې د القاعده ډلې یو لوړپوړی پلان جوړوونکی وژل شوی دی.

لاریونوال په اېکواډر کې د تېلو د سبسایډۍ د ختمېدو پر ضد واټونو ته راوتي وو؛ خو د اېکواډور ولسمشر ویلي، چې دغه ډول تاوتریخوالی به ونه زغمي.

الجزیره خبري شبکه د باخبره سرچینو په حواله راپور ورکړی، چې د حماس اسلامي غورځنګ او د اسرائیلي رژیم ترمنځ د غیر مستقیمو خبرو اترو لومړۍ ورځ په «مثبت» پرمختګ سره پای ته رسېدلې ده.

امریکا کې د فدرالي حکومت د ځنډېدنې کړکېچ شپږمې ورځې ته رسېدلی، خو جمهوري‌پالي او ډېموکراټان لا هم د هوکړې پایلې ته نه‌دي رسېدلي.

پاکستان کې د بلوچستان ایالت په کورکي سیمه کې د ځايي قبیلو او وسله‌والو ترمنځ نښته شوې چې په ترڅ کې یې د بلوڅ بېلتون‌پالو څلور غړي وژل شوي او دوه نور ټپیان شوي دي.

د مصر په شرم‌الشیخ ښار کې نن د غزې جګړې د پای ته رسولو او اوربند د تړون د وروستي جوړښت په اړه مهمې خبرې اترې پيل شوې دي.