رسنۍ وايي؛ چې د امریکا د پخواني ولسمشر ډونالډ ټرمپ نږدې همکار چارلي کرک د امریکا په یوتا ایالت کې په یوه پوهنتون کې د غونډې پر مهال په ډزو وویشتل شو او وروسته په روغتون کې مړ اعلان شو.

د ملګرو ملتونو امنیت شورا به نن، چهارشنبه د سپتمبر ۱۰مه، د قطر په پلازمېنه دوحه کې د اسراییل د پروني هوايي برید په اړه بیړنۍ غونډه وکړي. د فرانس پریس خبري اژانس د ډیپلوماتانو له قوله ویلي چې غونډه به د نیویارک په وخت د ماسپښین په ۳:۰۰ بجو وشي.

د پولنډ پوځي چارواکو پرون چهارشنبه اعلان وکړ، چې څو روسۍ بې‌پیلوټه الوتکې د اوکراین له لوري د پولنډ هوايي حریم ته ننوتي دي. د پولنډ دفاعي ځواکونه وايي، چې دغه الوتکې یې په نښه کړې دي.

پرون سې شنبه د اپل شرکت په کالیفورنیا کې د مرکزي دفتر په کوپرټینو کې د «Awe Dropping» په نوم یوه نندارتون جوړ شو، چې پکې د ایفون ۱۷ لړۍ نوي ماډلونه وړاندې شول. تمه شوې وه چې څلور نوي ماډلونه—ایفون ۱۷، ایفون ۱۷ اېر، ایفون ۱۷ پرو او ایفون ۱۷ پرو مکس—نندارې ته وړاندې شي.

د قطر د بهرنیو چارو وزارت ویاند، ماجد محمد النصار وايي چې اسراییلو په دوحه کې د حماس د سیاسي دفتر د څو غړو په استوګنیزو ودانیو باندې برید کړی دی.

د روسیې کرملین خبر خپور کړی چې د برېکس غړو هېوادونو مشرانو د برازیل د ولسمشر لوییز ایناسیو لولا دا سلوا په نوښت ځانګړې انلاین غونډه وکړه، څو د امریکا د ولسمشر ډونالډ ټرمپ د سوداګریزو پالیسیو او د نړۍوال اقتصاد پر اوسني وضعیت بحث وکړي.

د ترکیې په استانبول ښار کې د پولیسو او د اپوزېشن د جمهوریت‌پال ګوند (CHP) د پلویانو ترمنځ اخ و ډب د دویمې پرله‌پسې ورځې لپاره هم روانې دي. دا کړکېچ وروسته له هغې رامنځته شو چې یوې محکمې د دغه ګوند د استانبول د څانګې مشر له دندې ګوښه کړ.

د چین ولسمشر شي جېن‌پېنګ د شمالي کوریا د بنسټ اېښودو د ۷۷مې کلیزې په مناسبت خپل پیغام کې د دواړو هېوادونو پر نږدې اړیکو ټینګار کړی او ویلي یې دي چې بیجینګ چمتو دی له پیونګ‌یانګ سره ستراتیژیکې اړیکې او همکاري لا پیاوړې او پراخه کړي.

د مکسیکو په مرکز کې د بار وړونکي اورګاډي او د مساپروړونکي بس د ټکر له کبله لس تنه مړه شوي او ۶۱ نور ټپیان دي.

د سریلانکا په ختیځو سیمو کې د یوه مسافروړونکي بس د سړک څخه وتلو او یوې کندې ته لوېدو له امله لږ تر لږه ۱۵ کسان مړه او ۱۶ نور ټپیان شوي دي.