د امریکا دفاع وزارت د اوریګن ایالت په پورټلنډ ښار کې ۲۰۰ تنه ملي ګارډ ځواکونه ځای پر ځای کړي دي. دا اقدام د امریکا د ولسمشر ډونالډ ټرمپ د وروستۍ پرېکړې له مخې ترسره شوی دی.

د کرکټ اسیا جام سیالیو پایلوبه د هند او پاکستان ترمنځ په دوبۍ کې وشوه. په دې سیالۍ کې پاکستان لومړی توپ وهنه وکړه او په ټاکلو ۲۰ اورونو کې یې ۱۴۷ منډې جوړې کړې.

رویټرز راپور ورکړی چې د روسیې د بې‌پیلوټه الوتکو وروستیو بریدونو د اوکراین پلازمېنه کیف او د دې هېواد سویل کې ښارونه په نښه کړي دي. په بریدونو کې لږ تر لږه درې تنه وژل شوي او ۲۶ نور ټپیان شوي دي.

د امریکا د شمالي کارولینا په یوه ساحلي سیمه کې له یوې کېښتۍ پر یوه شرابخونه ډزې شوې دي چې درې کسه یې پکې وژلي او نهه نور یې ټپيان کړي دي.

د اسیا جام روانو سیالیو پایلوبه نن ماښام د افغانستان پر وخت اته بجې د دوبۍ په نړیوال کرېکټ لوبغالي کې د هند او پاکستان ترمنځ کېږي. د دې سیالۍ ګټونکې لوبډله به د اسیا اتله شي.

د هند د بهرنیو چارو وزیر اېس‌جي شنکر د ملګرو ملتونو د عمومي اسمبلۍ په اتیا یمه غونډه کې پرته له دې چې د پاکستان نوم واخلي، ویلي دي چې د هند ګاونډی هېواد د نړۍوالو ترهګرو مرکز بلل کېږي او له څو لسیزو راهیسې له هغه ځایه ترهګریز بریدونه طرحه کېږي.

د روسیې د بهرنیو چارو وزیر سرګي لاوروف خبرداری ورکړی، که پر دغه هېواد هر ډول ځمکنی یا هوايي برید وشي، مسکو به پرې توند غبرګون وښيي.

د خیبرپښتونخوا په دېره اسماعیل خان سیمه کې د یوې ترافیکي پېښې له امله ۱۱ کسانو خپل ژوند له لاسه ورکړی او درې نور ټپیان شوي دي.

د غزې جګړې د دوام په لړ کې، د امریکا ولسمشر ډونالډ ټرمپ وايي چې د سیمې له ګڼو هېوادونو سره د دې شخړې د حل په اړه مفصلې خبرې پیل شوې دي.

د اندونیزیا په لوېدیځ جاوا کې د یوې خپرې شوې پېښې له مخې، په روانه اونۍ کې له زرو څخه ډېر زده‌کوونکي د ښوونځیو دننه د وړیا خوړو له خوړلو وروسته مسموم شوي دي.