د کابل ولايت ا.ق وياند خالد ځدران رسنيو ته ويلي، چې د ۷ مې حوزې پوليسو د ماهرو غلو هغه اووه کسيزه ډله نيولې،کومې چې د کابل ښار په بيلابيلو څنډو کې د موټرو او موبایلونو غلاوې کولې. ځدران وايي نيول شوو تورونو کسانو پر خپلو جرمونو اعتراف کړی چې دوسيې به يې اړوندو ارګانونو ته وسپارل شي.

د هرات ولايت د پوليسو وياند غلام نبي نبي زاده وايي: د ادرسکن ولسوالۍ پوليسو یو تن هغه مهال نيولی چې څو ورځې وړاندې يې د همدې ولسوالۍ يو تن اوسيدونکى لومړی وژلى او بيا يې له سيمې څخه تېښته کړې وه، چې د امنيتي ځواکونو د کشفي راپورونو پر اساس پيدا او ونيول شو.

د بلخ ولایت ا.ق وياند محمد عيسی وثیق وايي؛ د ياد ولايت د کلدارې ولسوالۍ په اړونده سيمه کې،۹ تنه هغه مهال ونیول شول چې په ناوړه عمل جوارګرۍ( قمار وهلو) بوخت وو. نوموړی وايي د نیول شوو کسانو دوسیې اړوندو ارګانونو ته سپارل شوې دي.

د خوست ولایت ا.ق وياند طاهر احرار وايي چې ددې قومندانۍ اړوند د نشه يي توکو پر وړاندې د مبارزې مدیریت مسؤلانو، د یاد ولایت په مرکز منګسو سيمه کې د یو لړ برياليو عملیاتو په پایله کې، یو تن د مياولي په نامه له ۴۳ کیلو ګرامه خامو چرسو او ميل کلاشينکوف سره نیولی دی.

د کونړ ولایت ا.ق وياند فريد اللّٰه سالارزی وايي چې ددې ولايت پوليسو له لوري دولس تنه د يوې اونۍ په ترڅ کې له مرکز او ولسوالیو څخه نيول شوي دي. سالارزی زياتوي چې یاد کسان د قتل، غلا،ځنګل وهنې، د لرګیو قاچاق او د مخدره توکو د پلور په تور نیول شوي چې دوسیې يې اړوندو ارګانونو ته سپارل شوي دي.

د هرات ولايت د پوليسو وياند غلام نبي نبي زاده وايي؛ د يوولسمې حوزې منسوبينو دوه تنه قاتلين هغه مهال ونيول چې څو ورځې وړاندې يې د همدې سيمې يو اوسېدونکی وژلی وو. سرچينه وايي د نيول شوو کسانو دوسيې به په رسمي توګه تر بشپړېدو وروسته عدلي او قضايي ارګانونو ته ولېږل شي.

د پوليس راډیو د خبر له مخې؛ د نیمروز ولایت ا.ق وياند مولوي ګل محمد قدرت پوليس راډیو ته وویل: چې ددې قومندانۍ د نشه‌ يي توکو پر وړاندې د مبارزې مدیريت پوليسو،د زرنج ښار د مالدارانو سیمه کې د ١٠٠٠ کیلو ګرامه د بنګو دانې او ٢٢ کیلوگرامه ښيښې د قاچاق مخه نيولې ده. ښاغلی قدرت زیاتوي، چې تر دا مهاله د يادو نشه يي توکو پر تړاو څوک ندي نیول شوي.

د نورستان ولايت ا.ق وياند غلام الرحمن حيدري پوليس راډیو ته وویل چې په دې ولايت کې د پخوا په پرتله د جنايي پيښو کچه نېږدې صفر ته راټيټه شوې ده. نوموړی په ياد ولايت کې د جنايي پيښو د ټيټ والي علت د امنيتي ځواکونو ښه هماهنګي او د ولسونو هرې مشروع غوښتنې ته پر وخت رسيدنه يادوي. بل لور ته بيا د نورستان ولايت ولسونه د ولايتي مسؤلانو د نيکې رويې او ښه خدمت څخه پوره خوښ دي او وايي چې د اسلامي امارت له حاکميت نه را وروسته دوي ته په بيلابيلو برخو کې اړين خدمات وړاندې شوي دي.

د خوست ولايت وياند طاحر احرار وايي چې ددې ولايت امنيه قومندان حافظ عبدالرشید عمري په مشرۍ ددې قومندانۍ اړوند د تعلیم او تربیې مدیریت په چوکاټ کې د طارق ابن زيد له روزنیز مرکز څخه د افسرانو ۵۰ کسیز ټولي د عقیدوي، مسلکي او کشفي تکتیکونو د دوه مياشتني کورس څخه د فارغېدو وروسته ولسونو ته د خدمت په موخه وړاندې شول.

المرصاد تېره شپه د يوې خبرپاڼې په خپرولو سره ویلي؛ چې د سید ملا (حماس) په نوم دغه داعشی اصلًا د ماڼوګۍ ولسوالۍ اوسېدونکی و او نړنګ ولسوالۍ ته د تخریبي کړنو ترسره کولو په موخه راغلی و چې امنیتي ځواکونو پرې عملیات وکړل. همدارنګه د عملیاتو په ترڅ کې ياد کس د مقاومت هڅه کړې چې د ځانګړو ځواکونو له لوري د خپل عمل په سزا ورسېد. د سرچینې په حواله، نوموړی د ا.ا.ا د امنیتي ځواکونو د عملیاتو له ډاره، د نورو داعشیانو په څېر، پاکستان ته تښتېدلی و او په بلوچستان کې د انفجاراتو د زده کړې له ترلاسه کولو وروسته تازه هیواد ته راستون شوی و.