د خوست ولایت د محتسبینو په هڅو، یوه مېرمن چې شاوخوا اوه کاله د جبري نکاح له امله له خپلو قانوني او شرعي حقونو بې‌برخې پاتې شوې وه، د ښځو حقونو ته د درناوي، او د اسلامي او شرعي اصولو پر اساس وژغورل شوه.

د بریتانیا د بهرنیو چارو وزارت د افغانستان د ختیځو ولایتونو د زلزله‌ځپلو لپاره د درې میلیونه پونډو مرستې ژمنه کړې ده. دا مرستې به د ملګرو ملتونو اړوند ادارې لګوي او تر ډېره به د پاکو اوبو، لنډمهالې سرپنا او نورو بیړنیو اړتیاوو د برابرولو لپاره وکارول شي.

د بدخشان ولایت په «ارګو» ولسوالۍ کې یو مازدا موټر واوښت، چې په پایله کې درېیو تنو خپل ژوند له لاسه ورکړ او دوه نور ټپیان شول. د ځایي چارواکو په وینا، پېښه د «سرای‌دره» په سیمه کې رامنځته شوې او اصلي لامل یې د موټر تخنیکي ستونزه بلل کېږي.

د ملګرو ملتونو امنیت شورا اعلان کړی چې سبا (چهارشنبه) به د افغانستان په اړه غونډه وکړي.

د افغانستان اسلامي امارت د ملي دفاع وزير مولوي محمد يعقوب مجاهد قطر ته په رسمي سفر تللی او هلته يې د دغه هېواد د دولت له وزير محمد بن عبدالعزيز الخليفي سره لېدلي دي.

د ریاست‌الوزرا اقتصادي معاونیت نن (سه‌شنبه) د یوې خبرپاڼې په خپرولو ویلي چې ملا عبدالغني برادر په خپل کاري دفتر کې د ایران د صنعت، سوداګرۍ او کانونو له وزیر سیدمحمد اتابک او مل پلاوي سره ولیدل.

د کابل ښاروالۍ د ښار په بازارونو کې د اساسي خوراکي توکو ورځني نرخونه اعلان کړل، څو کورنۍ د خوراکي توکو د بازار وضعیت وڅاري او د خپلو پېرودنو پلان جوړ کړي.

د افغانستان کرکټ ملي لوبډله نن ماښام د اسیا جام په سیلیو کې په خپل ګروپ کې د بنګله‌دېش د کرکټ لوبډلې سره مخامخ کېږي. لوبه د ماښام اووه بجې پیلېږي.

د زابل ولایت یو شمېر نوموتو سوداګرو د یوې ناستې پر مهال له قلات ښاروالۍ سره د ۶۰۰ میلیونه افغانیو په ارزښت د ګډې پانګونې اعلان وکړ. د دې پروژې له مخې به په قلات ښار کې درې لوی مارکیټونه او زر هټۍ جوړیږي.

د ریاست‌الوزراء اقتصادي معاونیت وايي چې په افغانستان کې د سړو خونو د جوړولو پانګونکي به د پنځه کلونو لپاره له مالیې معاف وي.